शिक्षक कुटपिट प्रकरण: पाँच बुँदे सहमतीसंगै आन्दोलनका कार्यक्रम फिर्ता, भोलिदेखि विद्यालय सञ्चालन हुने।

कञ्चनपुर, १२ भदौ ।

शिक्षक वीरेन्द्र जोशी कुटपिट प्रकरणलाई लिएर आन्दोलनरत कञ्चनपुरका शिक्षक र प्रशासनविच

पाँच बुँदे सहमति भएको छ । उक्त सहमतिसंगै आन्दोलनरत शिक्षक संगठनहरुले आन्दोलनका सम्पूर्ण कार्यक्रमहरु फिर्ता लिएको छ । आन्दोलन फिर्ता लिए संगै बन्द विद्यालय भोलीदेखि खुल्ने भएको छ । भीमदत्त नगरपालिका १० जिमुवास्थित सिद्धनाथ माध्यमिक विद्यालयका लेखापाल वीरेन्द्र जोशीमाथि एक साता अघि कुटपिट भएको घटनालाई लिएर शिक्षक संघसंगठनहरूले आइतबार भीमदत्तका सबै शिक्षण संस्था  र सोमबारदेखि जिल्लाभरका सामुदायिक तथा संस्थागत विद्यालयमा अनिश्चितकालीन बन्द गरेका थिए । मंगलबार अपराह्न आन्दोलनरत पक्ष र प्रशासनबिच ५ बुँदे सहमति भएपछि आन्दोलनका कार्यक्रम स्थगित गरिएको नेपाल शिक्षक महासंघ आन्दोलन परिचालन समिति कञ्चनपुरले जनाएको छ । बुधबारदेखि सबै विद्यालयहरूमा नियमित पठनपाठन सञ्चालन हुने बताइएको छ ।

विद्यालयका कर्मचारी/शिक्षक वीरेन्द्र जोशीलाई कुटपिट गरेको भनी किटानी जाहेरीमा नाम उल्लेख भएका व्यक्तिहरू मध्ये ७ जना पक्राउ परेका र अझ २ जना पक्राउ पर्न बाँकी रहेकाले ती व्यक्तिहरूको खोजी तीव्र पारी यथाशीघ्र पक्राउ गरी कानुन बमोजिम कारबाही अगाडी बढाउने, भदौ ३ गते विद्यालयका कर्मचारी/शिक्षक वीरेन्द्र जोशी माथि कुटपिट भएको घटना प्रति दुख व्यक्त गर्दै शीघ्र स्वास्थ्य लाभको कामना गरी उनको आर्थिक अवस्था समेत कमजोर भएको हुँदा उपचार खर्च बापत भीमदत्त नगरपालिकाबाट रु. ५० हजार उपलब्ध गराउन नगर प्रमुखले प्रतिबद्धता जनाएको हुँदा नपुग रकमका लागि जिल्लाका अन्य स्थानीय तहलाई जिल्ला समन्वय समिति मार्फत र गृह मन्त्रालयलाई जिल्ला प्रशासन कार्यालय मार्फत अनुरोध गर्ने, विद्यालयमा सुरक्षा प्रबन्ध गर्ने क्रममा भएको कमीकमजोरी समेतमा अध्ययन गरी प्रतिवेदन पेस गर्न जिल्ला प्रशासन कार्यालयबाट समिति गठन भएको सन्दर्भमा नेपाल शिक्षक महासंघ समेतबाट आवश्यक सूचना उपलब्ध गराई सहयोग पुर्‍याउने, विद्यालय शान्ति क्षेत्र भएकाले विद्यालय परिसरमा हो-हल्ला, तोडफोड लगायतका शान्ति विरोधी गतिविधि हुन नदिन सबै पक्षले सजगता अपनाउने, विद्यालय र सुरक्षा निकाय बिचको सूचना नेटवर्कलाई अझ प्रभावकारी बनाउने सहमति भएसँगै नेपाल शिक्षक महासंघको अगुवाइमा शिक्षकका विभिन्न संघसंगठनबाट भइरहेको विरोधका सबै कार्यक्रम आजैबाट फिर्ता लिने निर्णय भएको छ ।

गत साताको आइतबार सिद्धनाथ माविका लेखापाल वीरेन्द्र जोशीले कक्षा १० मा अध्ययनरत एक छात्रामाथि यौन दुर्व्यवहार गरेको आरोप लागेपछि सोही विद्यालयका विद्यार्थी, अभिभावक र आसपासको क्षेत्रका व्यक्तिहरू आन्दोलित भएका थिए । त्यस क्रममा प्रहरीले लेखापाल जोशीलाई नियन्त्रणमा लिएकै अवस्थामा उक्त भिडले विद्यालय हाताभित्रै जोशीमाथि आक्रमण गरेको थियो । निर्घात कुटपिटबाट घाइते लेखापाल जोशीको अहिले पनि धनगढीस्थित निसर्ग अस्पतालको सघन उपचार कक्षमा उपचार भइरहेको बताइएको छ । लेखापाल जोशीको परिवारले दिएको किटानीका आधारमा कुटपिटमा संलग्न ७ जनालाई पक्राउ गरी आवश्यक अनुसन्धान गरिरहेको कञ्चनपुर प्रहरीले जनाएको छ । जिल्ला प्रहरी कार्यालयमा लेखापाल वीरेन्द्र जोशी विरुद्ध पनि छात्राको परिवारले जाहेरी दिएको छ । ती दुवै जाहेरी दर्ता गरी अनुसन्धान अघि बढाएको जिल्ला प्रहरी कार्यालय कञ्चनपुरका प्रवक्ता एवं प्रहरी नायव उपरीक्षक प्रकाश डाँगीको भनाइ छ ।